وردة بلاستيك.. لـ حمدي موسى

وردة بلاستيك.. لـ حمدي موسى

أنا مش هتغير

ولاعمري هاقول أي كلام

ولااسيب قناعاتي ورا الأوهام

كل اللي ينادي باسم الشعر

مجرد من أوصافه حرام

باسم التجديد بيقول لك

غير لون الفكرة وغير ديكورات االأحلام

مش ناوي أغير ورق الحيط

ولا هادهن باب المعني بزيت

ازاي ادخل لقصيدة بروحي واقول انا جيت

.....وسلام تقابلني بضحكة وتسأل جبت معاك حواديت

.......وبكام ازاي اتنكر للشعرا من أهل البيت

مش ممكن تبقي قليل الأصل

وتكدب وتقول اتربيت

انا واحد م اللي رماه الشعر

فقال حبيت

اقلع جلابيتي ازاي

وأغير طعم الشاي بلاتيه

.... أحية حتي مزاج الحدوتة الأصلي

بيلعبوا فيه

محفوظ ياحبيبي نجيب

خد نوبل اكمنه أديب

جاب مصر من البدروم

وراها لكل العالم ملط مخلاش أي هدوم

مكسوف من شكلك قوم

متجبليش ورد بلاستيك

وتقول لي دا ياسمين ....

علي مين

ياضنايا الشعر العامي

خصوصا محتاج مصريين

عارفين حواريها ودايسين

كل مافيها وفاهمين

المقادير كعك وبسكوت العيد

يابعيد في الأصل أساسه عيال

وتحط عليهم حبة فرح

تدوبهم ف صاجات

وتدخلهم مش فرن تدخلهم حكايات

تستوي علي ضحكة مصر

يافقري العيد مش للبهوات

العيد ليتامي عامود النور

الواقف يحمي السد عشان التعلب فات

فابلاش الشعر تغيروا فيه

خليه وحياة حداد

وسيبوه علشان الشمس تنز سمار لولاد

سيبوا العامية ياخلق بريحة طين ابنود

وبكارة منيا القمح

وحكمة بير مسعود

نضفوا حوالين الحرف

ياخلق بيخرج منه الدود

وسيبوا الفلاح مرتاح

ف الحر بلبس الصوف

مالك انت ياعم

الإحساس حاجة تخص الروح

خلوه بطاقيته

سيبوه ع الفطرة يقول خرافات

خلوه بالبايظ والمعيوب

ماهو ربك رب قلوب....

وغفور الشعر

دا آخر حتة جميلة ف مصر

عشان البيت مش طوب بقلوب

الإحساس لون الذات

خلوه علشان مايصد الغزو

عشان الناس بحالات

من ساعة م اتعلمنا الكدب

علي ايدين الخواجات

والحال بقي يصعب ع الكافر

والفكر بيطلع له ضوافر

والفجر مسافر بينه وبين النور

مسافات الشعر مهواش افندي

وعمره ماكان دراسات

الشعر حاجات أولها الأرض

العرض القدس الدين

الشعر العامي ياعمي الطين

اومال انا هاحكي لمين عن مين

انا لازم اكلم بني آدمين

واحنا ماهوش خافي عليك جاهلين

لا بنعرف نقرا كتب براني

ولا احنا كمان عاوزين

بس إحنا بنفهم قول الشعر

خصوصا لابن عروس

إحساسنا كمان مخصوص

فابلاش تلعبوا في الجين

لموا الأولاد وروهم ساكنين فين

وقولولهم بكره ان جه من غير امبارح

....عيب

واللي يسيب ورا يومه ساعات

هيقضي العمر غريب

الناس رح تاكل وشه

ويسألوا ع اللي جابوه

ويقولوا عن امه وابوه

اللي يبيع أمه جبان

واللي يبيع دمه سفيه

كواليس الأيام عار

واللي بيتنازل عن بواقيه

عمره ماهيكون إنسان ولا بار

بنهار رمي ضي ف نن عينيه

أوعي يغشوك ياخدوك يرموك

بره التقاليد

امسك في بكارة العيد

أصلها بدأت بحاجات

واهي ماشية تلم السنة الفرض

وناوية علي التوحيد

ايدك ويايا نصد

انشالله بعود وكمان

بقصيدة معاها ضمان

مختومة بختم النسر

وباين فيه العنوان

الأمر بجد وعاوزين سد

عشان يأجوج دول ياكلوا اليابس

والأخضر وجميع لالوان

فيه حاجات مجهولة

بيلعبوا في كتب أولي

وبيغموا التواريخ

دول وصلوا لأبلة نظيرة

ودسوا عليها طبيخ

وأمل وعمر مساجين

في كتاب مفيهوش صريخ

بيطفشوا أبو قردان

ويخبوا الغيط م النيل

بيغيروا دم النكتة

فاتبقي بدم تقيل

م تخلوا الشعر بعيد

وتعالوا نلم اليفط

اللي بتصطاد نسوان

من طلعت حرب

وعباس العقاد

الحد الأدني لأيها حزن

ياعم دقيقة حداد

عامية مصر الدارجة حماية

وخط دفاع

لو سيبت الفصحي تواجه سوبر ماركت

بيبيع أي بتاع

هتلاقي الهجمة شديدة

خصوصا م الأنطاع

سيبوا العامية تصد

اصلها فاهمة الأوضاع

وبلاش تفتحوا أبواب

ماكفاية علينا الراي والراب

خلوا العامية بروحها

كفايه علينا خراب

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*
*
*