auhv

مش جاى أحسس علي أزاز فتارين

المصدر: ناصردويدار
1692 مشاهد

مش جاى أحسس علي أزاز فتارين
ولا جاى أكتب نص معووج ذمته
أنا جاى أصحى الميتين
وجاى أرجع للصنايعى مهنته

حبيت بلادى بدون شروط

تتعوج...لازم أكون مظبوط

ينصلح حالها حتى لوكانت مع غيرى

أكون سعيد....مبتهج ....مبسوط

أحب أشوفها ملايه لف
بفانله كات
جيبه
جونله

بجينز

شورت

وعيش وملح

مدفي برد جدران البيوت

مش جاى أحنتف ف القصيده

ولاجاى أزوق ف الكلام

أنا جاى أقول لمصر ...مصر....جمله مفيده

تطلع سلام

تطلع يمام

تنفجر ألغام

تبقي عروسه
صاحبتى

حبيبتى

تبقي زى ماتكون

لوحتى تبقى....السيده الشهيده

مش جاى أجامل فخد راجل

ولاصدر بنت

طول عمرى راجل

وبمصرى. وحدانى و آمنت

أتسحل

أطلع لفوق

أنزل لتحت

أعطش

أجوع

من أمتى عاشق كان بيحسب ع الحبيبه
حسبته

أى حبيب بيحب وخلاص

ويرمى محبته

العشق هوسه

دوشه

خانكه وجنان

وبحب مصر

أرمله

بنت ستين كلب

مؤمنه
كافره

صبيه

مسلمه

مسيحيه
بحب مصر

كلها علي بعضها

وزى ماهىَّ

مش جاى أحسس

أنا جاى أقول للاعور انت أعور

والمكعوَّر انت متكعوَّر

والزبيبه العيره

والدقن ....أوعى تفكر

تحتال علي مصر

مصر الرسوله المؤمنه

باقيه لاخر العمر

انا جاى احب فمصر.....بس

إعلانات

إعلانات

 
‎اهم الاخبار العالمية والعربية والمصرية‎
Public group · 1 member
Join Group